Hum ne ‘Diacritics’ ke saath Roman Urdu likhne ke bajaye ‘Aasan Roman Urdu’ ka istemal kiya hai taaki har koi ise aasani se padh aur samajh sake, Roman Urdu padhne waalo ko talaffuz aur makharij seekhane ke liye mubalgha ghair zaroori maloom hota hai aur itni riaa’yat bhi qabile mazammat hai ke aayato yaani arabi matan ko hi Roman Urdu mein kar diya jaaye jaisa ke humare mulk ke kam feham nashireen ne kiya hai, Aayato ko Roman Urdu mein likhna najaizo haraam hai balki ‘Nastaleeq Font’ ka istemal bhi mana hai (Dekhiye Fatawa Nayeemiya)

Kanzul Imaan aur Hashiya Khazainul Irfan ko hum ek jild mein publish kar sakte the lekin is ke liye humein fonts ko chhota karna padta aur uske baad bhi hazaar se zyada safahaat ho jaate, Ek jild agar bahut moti kar di jaaye to uski binding mazboot nahin hoti aur jald khul jaati hai isiliye humne jildo ki tadaad badhane ko tarjeeh di, Fonts ka size kam hone ki wajah se logon ko padhne mein dushwari hoti hai aur ye uktaahat ka sabab bhi banta hai, Saath hi hum ne is ki tarteeb Urdu aur Hindi se alag rakhi hai, Umooman dekha jaata hai ke aayato ke saath saath un ke neeche tarjuma naqal kiya jaata hai aur phir tarjume mein hashiye (footnotes) ke numbers de kar tafseer ko hashiye mein darj kiya jaata hai, is mein kai padhne waalo ke saath dushwari ye aati hai ke tafseer ko baar baar hashiye mein talash karna hota hai jo ke kabhi kabhi dusre safhe mein hoti hai aur fonts ka size bhi kaafi kam hota hai to ye mutaale ki rawaangi mein rukawat ka sabab bhi banta hai, Hum ne kuchh is andaaz mein kaam kiya hai ke pehle chand aayato ko rakha hai phir agar aayat lambi thi to sirf ek aayat ko hi darj kiya hai phir us ke baad tarjume ko naqal kiya hai, phir tafseer ko is tarah laaya gaya hai ke jis aayat ya kisi aayat ke jis hisse ki wo tafseer hai us ko bayaan kar ke tafseer darj ki gai hai aur tafseer ke font size ko chhota nahin kiya gaya hai, hum ummeed karte hain ke padhne waalo ko is se kaafi aasani hogi

Mazkoora tarteeb ke mutabiq jab hum ne is ki composing (formatting) shuru ki to Pehle Paare ko mukammal karne par ye andaza hua ke is ki 6 jildein tayyar hongi kyunki Pehla Paarah jab mukammal hua to taqreeban 120 se zyada safahaat ho chuke the lekin jab mazeed 4 Paare shamil kiye gaye to zyada sahih andaza hua ke is ki 5 jildein hongi aur har jild mein 6 Paare shamil kiye jayenge, ye is aitbaar se bhi tay hua ke humein ek jild mein 500 se 600 safahaat hi rakhne the jo ke ek jild ke liye zyada munasib hai, Phir jab is ki printing ki baari aai to hum ne ise bhi behtareen rakhne ki koshish ki hai; Khalifa -e- Aala Hazrat, Allama Mufti Amjad Ali Aazmi rahimahullahu ta'ala likhte hain ke:

Qurane majeed ki kitabaat nihayat khushkhat aur waazeh harfon mein ki jaaye, kaaghaz bhi bahut achha raushnayi (ink) bhi khoob achhi ho ke dekhne waale ko bhala maloom ho

(Ba Hawala Durre Mukhtaar, Raddul Muhtaar)

Phir likhte hain: Baaz chhapne waale nihayat mamooli kaaghaz par bahut kharaab kitabaat wa raushnai se chhapwate hain ye hargiz na hona chahiye

Aisi kai baato ko madde nazar rakhte hue humne ise behtar banane ke liye standard formatting aur modern publishing ke usoolo ke tehat kaam karne ki koshish ki hai, Printing ke liye latest technology ki high quality digital industrial monochrome machine ko istemal mein laaya gaya hai aur hard format mein do variants bhi laaye gaye hain jin mein alag alag qism ke kaghaz ka istemal kiya gaya hai, Awaame Ahle Sunnat se humein ummeed hai ke wo ise na sirf pasand karenge balki humare liye dua bhi farmayenge aur is mein kahin koi ghalati payenge to humein muttala farmayenge

Allah ta’ala humari is kawish ko apni bargaah mein qabool farmaye aur humari khataao’n ko muaaf farmaye aur humari kotahiyo se dar guzar farma kar ise pazeerai ataa farmaye ke isse zyada log faida utha sakein aur ye humare liye zariya -e- najaat ban jaaye

About Bahaare Tehreer

"Bahaare Tehreer" majmua hai mukhtalif mauzuaat (topics) par likhi gayi Ilmi, Tehqeeqi aur Islaahi tehreero ka; Is mein shamil beshtar tehreerein raaqimul huroof (Muhammad Sabir Qadiri aka Abde Mustafa) ki likhi hui hain aur baaqi ke saath un ke likhaari ka naam maujood hai jis se unhein pehchana jaa sakta hai

Is risale ke har hisse mein 25 tehreero ko darj kiya gaya hai jo ke naye qaari (Beginner readers) ke liye munasib maloom hote hain aur phir mukhtalif mauzuaat ka hona bhi ise mazeed dilchasp banata hai aur qaari (reader) ke zauq ko badha kar uktaahat ko door karta hai, is lihaaz se ye kaha jaa sakta hai ke jo log kitabein nahin padhte wo agar is se apne safare mutala'a ka aaghaz farmayein to ye un ke liye kaafi mufeed saabit hoga, is silsile "Bahaare Tehreer" ke chand hisse padhne se hi unhein kitabo mein raghbat haasil hogi (Insha Allah)