Imame Ahle Sunnat, Aala Hazrat rahimahullahu ta'ala ne apne daur mein sar uthaane waale bade bade fitno ki nishandehi farmayi, un ka zabardast radd farmaya aur is risale ‘Hussamul Haramain’ ke zariye un ki haqeeqat poori dunya ke saamne laa kar rakh di, ye sirf ek risala nahin balki ek tehreek aur ek inqelab hai jis ne musalmano ke imaan ki hifazat ki, jab se ye manzare aam par aaya tab se is ki shohrat ka danka har taraf baj raha hai aur ahle imaan ke yahan is ki maqbooliyat din ke suraj se zyada zaahir hai Ulama -e- Haramain shareefain (yaani Makka mukarrama aur Madina munawwara ke Ulama) ne ise bahut pasand farmaya, kisi ne ise khalis sone ka tukda kaha to kisi ne is ke likhne waale ko waqt ka mujaddid tasleem kiya, aisi kai baatein aap un taqareez mein dekhenge jo is risale mein shamil hain, hum is ki tareef karne se qasir hain Hum ne ise ‘Aasaan Roman Urdu’ mein shaya kiya hai taaki is daur mein awaame Ahle Sunnat ka wo tabqa jo Arabi, Urdu aur Hindi waghaira nahin padh sakta lekin Roman Urdu ko ba-aasani aur shauq se padhta hai, wo bhi ise padh kar badmazhabo ke kufr aur un ke fareb ko samajh sake aur apne imaan ko in gumraho se bacha sake Hum ne Aasaan Roman Urdu ke istemal ke saath saath ibarato ko bhi aasaan karne ki koshish ki hai taaki har ek ise aasani se padh kar samajh sake, Ulama -e- Haramain Shareefain ke mukhtasar halaat ko bhi darj kiya hai taaki un ki taqareez ki wuq'at (ahmiyat) ka sahih andaza ho sake, Poori taqreez ke bajaye khulasa naqal kiya gaya hai kyunki Roman Urdu padhne waalo ki riaayat ke liye yahi behtar hai aur ye husoole maqsad ke liye bhi kaafi hai ke maqsood Ulama -e- Haramain ki tasdeeq zaahir karna hai Allah ta'ala humari is koshish ko apni bargahe paak mein darja -e- maqbooliyat ataa farmaye aur humein mazeed khidmate deen ki taufeeq ataa farmaye